80-ամյա Ժենյա Ներսիսյանը 10-ամյա տղայի դեր է խաղում - 29 Апреля 2012 - Բարի գալուստ
Главная » 2012 » Ապրիլ » 29 » 80-ամյա Ժենյա Ներսիսյանը 10-ամյա տղայի դեր է խաղում
18:47
80-ամյա Ժենյա Ներսիսյանը 10-ամյա տղայի դեր է խաղում
Էրիկ Էմանուել Շմիթի "Օսկարը եւ վարդագույն հագուստով տիկինը” կարդալուց
հետո Վահանը որոշում է կայացնում բեմադրել այն, բայց միայն համապատասխան
դերասանուհու հետ. "Քանի որ ստեղծագործության մեջ ուժեղ էմոցիաներ,
հոգեվիճակ, կերպարներ կան, ամեն դերասան չէր կարող խաղալ, ինձ համար
կարեւոր էր խաղացող դերասանի անհատականությունը”:
"Տիկին Ժենյան
ֆենոմենալ երեւույթ է. 80 տարեկանում 2 ժամ շարունակ բեմում միայնակ կարող է
խոսել, թռվռալ, բարձրանալ, իջնել… այդքան էներգիա ունի: Նա պրոֆեսիոնալ
դերասանուհի է, ավելորդ երկխոսության մեջ չի մտնում, ուշադիր լսում է
պահանջվածը եւ աշխատում: Որոշ տեսարաններ հարմարեցրել եմ իր ներքին
զգացողություններին”,- նշել է բեմադրիչը:
Վահան Բադալյանը վաղուց է ճանաչում դերասանուհուն, նրանց ծանոթությունն ու
շփումն էլ սկսվել է 2006 թվականից: Բեմադրիչն այս ստեղծագործությունը տվել է
տիկին ժենյային, որն էլ հավանել ու համաձայնել է. "Տպավորվեցի առաջին իսկ
կարդալուց: Թեեւ 80 տարեկանում դժվար է էջերով տեքստն անգիր անել, բարդ է
խաղալ 10 տարեկան տղայի դեր, չարչարվում ես, պրպտում, բայց դա քաղցր
տառապանք է”:
"Օսկարը եւ վարդագույն հագուստով տիկինը” գործը
պատմում է արյան քաղցկեղով հիվանդ 10-ամյա Օսկարի մասին. ներկայացվում է
նրա կյանքի վերջին 12 օրը: Վարդագույն հագուստով տիկինն առաջարկում է նրան
խաղ խաղալ եւ ամեն օրը հաշվել որպես տասը տարի, ամեն օր Աստծուն նամակ գրել
եւ պատմել այդ օրվա մասին: Այս օրերի ընթացքում էլ բացվում են
փիլիսոփայական ու հոգեբանական շերտեր` հավատի, կյանքի նկատմամբ
վերաբերմունքի, տարիքի, ծնողներ-զավակներ հարաբերությունների մասին: Բեմի
դեկորացիաները տեղափոխում են հիվանդանոցի սենյակ, օրացույցն էլ տարվա
վերջին` դեկտեմբերի օրերն է "հաշվում”:
2 գործողությամբ դրաման, Վահան Բադալյանի հավաստմամբ, դասական
մոնոներկայացում չէ, բեմում կա երկրորդ հարթակ` ուրվականների ու ստվերների
մասնակցությամբ: Բեմադրիչը կարծում է` երիտասարդ դերասանուհիները, դիտելով
Ժենյա Ներսիսյանի խաղը, վարպետության դաս կանցնեն: "60 տարի է` բեմում եմ,
ռադիոյում, հեռուստատեսությունում, 150-ից ավելի դեր եմ խաղացել, ամեն
կերպար աստիճանաբար հասունացրել եմ իմ մեջ ու լույս աշխարհ եմ բերել,
դրանով ամեն անգամ ինձ երջանիկ եմ զգում, չեմ կարող չխաղալ”,-նշել է
դերասանուհին: Երեւանի պատանի հանդիսատեսի թատրոնի դերասանուհին իր 80-ամյա հոբելյանին`
նախորդ տարվա նոյեմբերին արժանացել է ՀՀ մշակույթի նախարարության կողմից
ոսկե մեդալի` հայ թատերարվեստի զարգացման, նաեւ սփյուռքում
հայապահպանության գործում ունեցած վաստակի համար, օրեր առաջ էլ Արտավազդ թատերական մրցանակաբաշխության ժամանակ պարգեւատրվել է թատերարվեստին արժանապատիվ ծառայության համար: Ժենյա Ներսիսյանը 1993-ին մեկնել է Լոնդոն, ուր Գեւորգ Թահթայան կիրակնօրյա
հայկական ազգային վարժարանում դասավանդել է գրականություն ու գեղարվեստ,
բեմադրել մի շարք ներկայացումներ. "Անգլիայում հայ շատ երեխաներ
դժվարությամբ են հայերեն խոսում, բայց ոգեշնչում եմ նրանց, հայերենով
խաղում են, արտասանում: Պարբերաբար գնում-գալիս եմ, վերջերս էլ մի քանի
ամսով հրավիրել էին դասավանդելու”:
"Օսկարը եւ վարդագույն հագուստով
տիկինը” ներկայացումը թատրոնի խաղացանկում է, այն կարող ես դիտել "Փոքր
թատրոն”-ում նաեւ ապրիլի 4-ին եւ 7-ին: