Սայաթ-Նովայի ծննդյան 300-ամյակին նվիրված
միջացոռումների շրջանակում հուլիսի 10-ից մեկնարկում է ինքնուս
ստեղծագործողների փառատոն, որը կլինի երկու փուլով: Այս մասին, այսօր՝
հունիսի 14-ին, լրագրողների հետ հանդիպմանն ասաց «Սայաթ-Նովա» մշակութային
միության նախագահ Թովմաս Պողոսյանը:
Փառատոնի առաջին փուլը կկայանա
մարզերում, որտեղ կընտրեն տվյալ մարզերից հայտ ներկայացված մասնակիցների
ընտրությունը, որից հետո լավագույնները կգան Երեւան՝ մասնակցելու երկրորդ
փուլին: Թովմաս Պողոսյանը նշեց, որ արդեն հետաքրքրություն կա մասնակիցների
կողմից, հայտերը ուղարկվում են մարզպետարաններ, տարիքային սահմանափակում
չկա:
Նրա խոսքով՝ փառատոնի նպատակն է ասպարեզ բերել այն մարդկանց,
ովքեր օժտված են ստեղծագործելու լուրջ շնորհքով, սակայն մինչ այսօր
հնարավորություն չեն ունեցել ներկայանալու: Փառատոնի ավարտը հուլիսի 30-ն
է:
Անդրադառնալով Սայաթ-Նովայի ծննդյան թվի վերաբերյալ առաջացող
վեճերին՝ նա նշեց, որ մեր գերխնդիրը ոչ թե Սայաթ-Նովայի ծննդյան թվականի
ճշգրտումն է, այլ նրա արվեստը հնարավորինս ժողովրդին հասցնելը, ապրեցնելը:
Նա կարեւորեց Հայաստանի բոլոր պետական կոլեկտիվների ծրագրերը Սայաթ-Նովայով
հագեցնելը:
Ասուլիսի մյուս բանախոսը՝ Աշուղ Աստղանուշը, նշեց, որ
ինքը ստեղծագործել է մանկուց, դրան նպաստել է նաեւ բանասիրական
կրթությունը, բայց ավելի շատ ստեղծագործելու հնարավորությունը տրվել է
Աստծո կողմից: «Ով չանցնի Ջիվանիի դպրոցը, երգերը կմնան թերի: Աշուղի երգը
երբեք չի արժեւորվի, եթե չգա ու չգտնի այդ սուրբ բոստանը»,- ասաց նա:
Նշենք,
որ 2012թ Սայաթ-Նովա մշակութային միությունը հայտարարել է «Սայաթ Նովայի
տարի», տարին սկսվել, կշարունակվի եւ կավարտվի Սայաթ-Նովային նվիրված
միջոցառումներով: Աշնանը ՅՈՒՆԵՍԿՕ-ի հետ համատեղ կանցկացվի նաեւ
Սայաթ-Նովային նվիրված միջազգային փառատոն, գիտական նստարջան: Նրանք
համերգային շրջագայությամբ մեկնելու են Արցախ, Վրաստան, ՌԴ-ի հայաշատ
քաղաքաներ: «Մենք գնում ենք երգելու հայ զինվորի համար»,- ասաց Թովմաս
Պողոսյանը:
Պատրաստում են հրատարակչության «Սայաթ-Նովա, խաղեր»,
«Սայաթ-Նովան՝ աշուղների խաղերի մեջ» ժողովածուները, որտեղ ընդգրկվելու են
Սայաթ-Նովային ձոն գրված հեղինակների ստեղծագործությունները: